踏入2017年嘅下半年，7、8月又係學生放暑假嘅大日子，所以今個月有唔少青春劇或是由偶像派孭飛嘅劇集出籠，等啲學生觀眾可以趁暑期日煲夜煲。

(一)tvN《河伯的新娘2017》（首播日期：7月3號）
《河伯的新娘2017》採取先拍後播嘅方式，改編自韓國漫畫家嘅作品《河神的新娘》，並由南柱赫夥拍申世京及孔明做主角，故事就食正之前《鬼怪》題材，南柱赫飾演水神河伯，小心墜落喺地球上，仲申世京飾演嘅人類神經外科醫生相戀，申世京仲成為河伯嘅新娘嘅故事。

(二)KBS《學校2017》（首播日期：7月17號）
KBS嘅《學校》系列深受年青粉絲歡迎，所以長拍長有，前年嘅《學校2015》令金所炫、陸星材同南柱赫人氣急升，今年再接再厲開拍《學校2017》，並搵來新力軍限定女團I.O.I前成員金世正、《嫉妒的化身》男星金正鉉、《所羅門的偽證》男星張東尹擔任主角。劇中金世正飾演夢想同已經考上大學嘅初戀男友一齊入同一間大學，點知因為佢成績太差，有意通過自己嘅漫畫令自己成功入大學，但卻被大家視為不良學生。

(三)MBC《戀愛中的王》（首播日期：7月17號）
又一齣先拍後播嘅劇集，由去年底已開始拍攝，早前已完成所有拍攝工作。劇集由少女時代成員允兒孖《未生》男星任時完以及洪宗玄主演，劇情講任時完飾演嘅世子以及洪宗玄飾演嘅高麗王族，為爭允兒而反目成仇。允兒為此劇亦刻意事前苦練武術，唔少武打場面都親自上陣。而劇集亦喺台灣、新加坡、馬來西亞、汶萊及印尼等地同步播出。

(四)SBS《再次重逢的世界》（首播日期：7月19號）
早前宣佈由李沇熹、呂珍九及安宰賢擔正出演劇集，並大玩「姊弟戀」橋段，呂珍九喺劇中會飾演一名19歲少年，戀上31歲嘅護士李沇熹，人夫安宰賢則飾演餐廳老闆，三人喺劇中將展開三角戀。

(五)MBC《死而復生的男人》（首播日期：7月19號）
由《來自星星的你》大奸角申成祿孖姜藝媛、崔民秀、李昭娟等演員出演，故事以生活富裕嘅王國伯爵為找尋女兒嚟到韓國嘅故事，崔民秀飾演中東伯爵，姜藝媛飾演伯爵嘅女兒，佢一直夢想成為編劇，至於申成祿就飾演伯爵嘅女婿，雖然外表出眾，但現實只係平凡嘅銀行職員。

(六)SBS《操作》（首播日期：7月24號）
《操作》由南宮珉、劉俊相、嚴智苑及全慧彬主演，內容講飾演記者嘅南宮珉，因為親眼睇住哥哥因揭發腐敗現象而死亡後，南宮珉為咗報仇最後成為記者，並周圍專找社會腐敗現象。

(七)KBS《最強送貨員》（首播日期：7月28號）
曾出演《回答吧！1988》、《芝加哥打字機》嘅男星高庚杓首次擔正做男主角，並夥拍蔡秀彬、金善浩、高媛熙等出演劇集，故事講高庚杓飾演嘅炸醬麵送貨員嘅愛情同埋追求夢想嘅故事。