受到乘客量下跌嘅影響，國泰下個月開始，會陸續將七架飛機停飛，泊喺澳洲墨爾本附近嘅一個機場。當中包括一架喺國泰機隊當中，最色彩繽紛嘅飛機──「香港精神號」。
話說呢架「香港精神號」好有象徵意義，因為係國泰為迎接二千年嘅來臨，搞咗個全港設計比賽嘅冠軍作品，話係代表香港人「積極進取，飛越更高理想」。
本來，呢架咁靚、又髹上香港高樓大廈，同埋一班年輕運動員熱烈歡呼嘅波音七四七客機，喺三萬幾呎嘅高空上飛翔，都真係香港人嘅驕傲，但係，「香港精神號」最終都係敵唔過經濟下滑同航空業不景，而要喺今年三月開始停飛嘞！八方都禁不住悲從中來！
不過，國泰話，「香港精神號」停飛，都只係暫時性。但係點解好揀唔揀，要停飛「香港精神號」咁唔好意頭呢？國泰就解釋話佢哋有啲新計劃，但係暫時賣個關子，唔話畀八方聽喎。


E-mail：[email protected]