青年事務委員會主席劉鳴煒今朝喺電台節目話，「這幾年不同黨派都拿『青年人』嘅標籤嚟『抽水』，不論是攻擊政府或支持政府，強調青年發展工作不應有政治元素」，估唔到最先發難嘅唔係民主派，而係民建聯。青年民建聯主席顏汶羽剛剛發聲明，直指對以上言論「完全不能接受」

其實顏汶羽早前已經自薦加入政府即將成立嘅青年事務發展委員會，暫時未知會唔會被娥班子吸納，但佢就先發制人向劉鳴煒發炮，強調政黨嘅角色係大家基於一致同意嘅某啲特殊原則，通過共同奮鬥來促進國家利益而團結起來嘅人民團體，有收集市民意見、並將意見反映畀政府嘅功能。

佢話呀，劉鳴煒用「抽水」嚟形容不同政治光譜政黨嘅青年工作，係抹殺大家多年來嘅努力，呼籲劉對方以及青年事務委員會委員虛心聽取社會不同持分者對青年工作嘅意見同政策建議，唔能夠偏聽同自我設限，咁先係舒緩青年面對困難、落實青年政策嘅正確方向。

喺政治行先嘅大時代，懶理講嘅嘢係咪事實，好容易動輒得咎，唔知劉鳴煒有冇計仔，o氹返民建聯呢班「兄弟」？