巴黎聖日耳門（PSG）嘅兩大巨星尼馬同卡雲尼，上場聯賽爭射完罰球就爭12碼，內訌擺到出面，法國《隊報》禮拜一更加用頭版黎講吓巴黎內訌，繪影繪聲話賽後烏拉圭射手卡雲尼當面話唔喜歡尼馬爭射嗰種態度，貴為全球最高身價球員，一心過檔PSG做大佬嘅尼馬，當然不甘示弱，要巴西鄉里兼隊長堤亞高施華出面分開兩人，先至冇進一步衝突，不過卡雲尼就好嬲咁走人，冇理隊友、冇行正常通道，淨係自己1個人喺後面走，甚至英國《太陽報》話，尼馬已經喺ig unfollow咗卡雲尼。

呢單新聞一路發酵，對PSG梗係唔係好事，但對法甲其他19隊就應該係。尼斯射手巴洛迪利仲喺ig story度影低《隊報》頭版，再tag尼馬話：「射波前你根本不應該詢問（You shouldn't even ask for shot them）」呢句說話點解，就真係睇你點演繹，不過點都好，巴神似乎都想煽風點火，等大家多啲花生食。