今日係男團SuperJunior（SJ）成員晟敏、JYJ成員金在中同韓劇《急診男女》崔振赫入伍做新兵嘅日子。雖然三子早就講明想靜靜咁入伍，唔會進行任何公開活動，不過今日亦有唔少粉絲專誠拎晒應援牌前去京畿道軍營，希望可以見下偶像一面。

而喺大約12點左右，SJ成員晟敏就喺老婆金思垠陪同下，坐車抵達軍營，當佢見到在場百多名粉絲前來歡送時，都忍唔住落車同大家揮手道別，見到戴帽、已經剪短咗頭髮嘅晟敏表現輕鬆，而粉絲就舉起「會等待兩年」嘅紙牌，表現不捨。

相反金在中就未有好似晟敏咁，到咗軍營之後未有停車見粉絲，直行直過，令現場超過200名粉絲只能隔車道別，有粉絲因為見車見唔到人已情緒激動，要軍營出動軍人嚟維持秩序。

至於崔振赫就未有現身，而佢噚晚就喺Instagram公開咗自己剪咗短頭髮嘅新相。而三子預計會喺下年12月30日退伍。