神劇《太陽的後裔》上周四圓滿結局，令一眾粉絲都話冇得再見「劉大尉」宋仲基而好傷心。不過宋仲基就由今日開始，以首爾為起點，開始亞洲巡迴粉絲見面會，而6月11號仲會巡到香港。而據悉宋仲基會喺見面會上大開金口唱歌之餘，更會化身「劉大尉」着軍服畀粉絲回味佢喺《太陽》中嘅英姿。

據相關人士透露，宋仲基除咗開金口唱《太陽》嘅其中一首OST益粉絲之餘，粉絲更有機會同佢作近距離接觸。而且今次嘅粉絲見面會仲有特別嘉賓出演，雖然未知香港場會唔會一樣有特別嘉賓，事關要同埋嘉賓夾行程都好難，但已經有唔少粉絲好奇嘉賓係邊個，不過大部份粉絲都估係同佢最老友嘅李光洙。而今次宋仲基仲會有part分享環節，打算同粉絲講吓心底話，識真識做！

另外，據悉今次嘅粉絲見面會長達2小時，而又會有數十人隨行，拍得住演唱會嘅陣容，令粉絲相當期待。