張燊悅同曾華倩今日喺四季酒店出席護膚品活動，張燊悅話已改名為「張新悅」，仲會加夫姓，即係「楊張新悅」佢話前名係藝名，幾乎已經唔記得咗真名，身份證亦會改名：「嫁咗楊家咁耐都冇加姓，返內地對個燊字陌生，唔係為復出、生小朋友改名。」

而以代言人身份出席嘅曾華倩，被大會冠以「不老傳說」，曾華倩話唔會因為年齡影響心情，亦唔會學米雪咁晒泳照，問佢有冇追求者？佢話：「留意吓，兜兜轉轉可能喺身邊。」問佢係咪指馬國明？佢好尷尬咁話：「好耐冇聽呢個人名，好多劇見到佢。」