英格蘭代表隊後衛菲爾鍾斯噚日因為喺練波期間受傷，得到領隊修夫基放人，嚟緊對德國場友賽，同埋禮拜日主場對立陶宛嘅2018俄羅斯世界盃外圍賽都唔使預佢。咁點解菲爾鍾斯會受傷㗎呢？修夫基今日就揭開謎底，包保曼聯領隊摩連奴知道之後O晒嘴！

原來菲爾鍾斯係畀紅魔鬼自己友基斯史摩寧踩傷㗎，你話摩佬唔嬲就假。修夫基話成單嘢其實真係好無辜，因為鍾斯喺一次鏟波當中整傷腳趾，原因係佢同史摩寧嘅timing都錯晒，結果搞成咁。菲爾鍾斯受傷之後已經離隊返去曼徹斯特，英格蘭足總就話暫時未有補選計劃，但係由於車路士嘅加利卡希爾禮拜日要停賽，所以修夫基會等踢完對德國場友賽，先決定要唔要補選球員。