人大今早表決通過「港版國安法」，條文不單令為民主自由而戰的香港抗爭者前景堪虞，連多間黃店也受到影響。龍門冰室負責人張俊傑今日在餐廳的Facebook專頁發表聲明，宣佈退出黃色經濟圈，其後張俊傑向《蘋果》指，一是認為經濟圈慢慢出現「大台」，自己受到「藍絲」、「網民」和「黃店們」的攻擊，引發許多同路人批評；二是最近收到死亡恐嚇，「有人話會搵國安搞我」，故為了自己生意旗下近200位員工的安全，但未來會繼續就社會不公義發聲，亦會繼續以其他方式服務香港人和貢獻社會。

杜汶澤今日亦在FB就龍門冰室宣佈退出黃色經濟圈而留言，他說：「我當然明白每個人都會喺唔同嘅階段選擇做唔同嘅嘢，無話啱定錯，食幾多、着幾多，自己攞嚟。但係作為一間黃店，宣傳要退出黃色經濟圈，好想知技術上係點處理？一班人，決定去幫襯一間餐廳，純粹係自由意志，選擇權亦都係喺顧客身上，咁作為一間餐廳，操作上係點樣可以退出呢？我覺得呢間餐廳個老闆對資本主義同自由巿場經濟有啲誤解。」

阿澤還說：「如果選擇結業，咁顧客當然唔能夠再幫襯你啦！但係又唔係喎，又繼續打開門做生意喎，咁究竟係點退出呢？」阿澤亦以「媾女論」去比喻事件：「你本身好多女鍾意你，而你又成日媾女，但係你突然間有一日話「退出媾女圈」，咁係好令人費解，個圈究竟係邊度呢？極其量你都可以話自己以後唔再媾女，叫啲女死心啦，甚至乎你可以話轉咗鍾意麻甩佬，再唔係你自殺死咗佢，咁就真正能夠做到以後都唔會再媾女啦。但係就絕對唔會話自己退出媾女圈。」

最後阿澤說：「因為媾女圈唔係香港眾志，你根本搵唔到渠道加入，又何來退出呢？所以其實你可以選擇宣佈由今日開始你自己唔再係黃絲，咁講我就理解。不過其實你黃唔黃都真係唔係好關我事，因為我都係幫襯過一次，好難食，所以冇再去。都係嗰句，搞咁多嘢，你不如煮好啲啲嘢食好過啦！好彩Yellopenrice冇介紹過你哋咋！我哋張貼紙好實㗎！好難搣㗎！」

有網民留言：「其實佢除咗執笠真係無第二條路，反正都執夠啦，係時候收手啦！」阿澤亦有回覆：「我覺得可以轉藍店，可能會好好生意呢？反正藍絲食開屎唔會好介意。」
------------------------------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新