一向言論出位嘅民建聯大狀馬恩國，早排用咗3年時間，用英文撰寫「香港《基本法》：法律原則和政治爭議」一書，今日佢同傳媒聚會時就派發呢本書嘅中文撮要，當中序言寫明，今次出版呢本書嘅目的，「就是為了打破建制派沒有威權英文基本法參考書的局面」，又指現時以英文編著嘅《基本法》參考書，「絕大多數都由泛民主派背景學者編撰」，令法律界人士絕大多數都係支持泛民主派喎。

馬大狀又話，呢本新書總共印製咗500本，由基本法委員會委員譚惠珠幫手寫序，佢送咗百幾本畀朋友後，現時巿面上流通有得賣嘅，仲有300幾本，每本盛惠1500元，目標讀者係香港嘅律師同法官。

馬大狀質疑，其實法官好多判決講到尾都係政治取捨，佢希望法官睇完佢呢本新書後，會學識如何同不同意見磨合，令日後啲判決唔會引起社會不穩喎。