Jade自問非常鍾意揸車，「我由16歲開始就揸車，Beetle、寶馬、Benz都揸過，喺加拿大嘅時候仲跟好多鍾意玩跑車同改車嘅朋友一齊玩。」Jade講到眉飛色舞，「我媽咪都仲揸緊E-Class，但就同呢部E63完全唔同，單係聽啲引擎聲就知佢馬力好勁！」單係聽聲又點可以感受得到E63嘅514匹澎湃動力呢？梗要佢落場揸番轉，「嘩！跑咗一圈，真係覺得好勁，部車好Sensitive同有力，起步快、加速快，就算開到100km/h都好定，就算唔揸，齋聽聲已知部車勁！」一副專家口吻，Jade仲講到手舞足蹈，看似文靜嘅Jade呢一刻好鬼活潑兼多表情！

AMG絕對唔係浪得虛名，E63配備咗6.2升V8引擎，馬力高達514匹，一開車佢副引擎就「叫」定先，咆哮聲非常犀利；一踏油門，部車根本係推住背行，而且軚盤順暢到不得了，絕對屬跑車級數，一啲都唔似佢外表般優雅，絕對係睇得又跑得。
對我嚟講，Jade就同E63一樣，睇得又「跑得」，Jade外形甜美，講說話嘅時候溫婉細膩，但唱起歌嚟聲靚又夠氣，而且仲好堅強兼有原則，「每個人都有失意同迷失嘅時候，我都唔例外。以前我唱好多苦情歌，喺搵番自己之後開始練習唱腔，唱嘅歌正面兼感性咗，希望透過音樂同文字做多啲有意義嘅事，令自己同身邊嘅人都開心啲。」Jade最近就出埋本書，個名仲同隻碟一樣––《迷失與尋回》，Jade尋回自己之餘亦鼓勵身邊人尋找自己目標，有實力有負擔又有內涵，喺人生旅途上絕對跑得起。

問Jade可有心目中嘅DreamCar，佢諗都唔諗就答：AstonMartin！既然係咁，唱片同書成績好嘅話會唔會買部AstonMartin獎勵自己呢？Jade即時斬釘截鐵話唔會，「我會買部車獎勵自己，但就係七人車，我婆婆年紀大，身體唔好，私家車矮身，佢上落同坐都唔方便兼唔舒服，七人車就好好多；而且七人車仲可以喺開工時接埋其他工作人員㖭！」講到尾，都係為咗其他人，果然夠堅持講到做到，令自己同身邊嘅人開心原來唔係好難！

Jade揀咗AstonMartin做DreamCar，莫非係占士邦效應？非也！「我好鍾意睇《LasVegas》，見阿頭Ed揸住部AstonMartin出場好型，架車又潮性能又好，幾啱我性格！」

引擎：6,208c.c.V8DOHC
馬力：514ps/6,800rpm
扭力：64.2kg-m/5,200rpm
傳動：7前速7GTronic自動波箱
0-100km/h：4.5秒
查詢：Mercedes-BenzPerformanceStudio
（25948128）
$1,388,000