對於中環街市快要進行復修與活化工程,佢帶點無奈咁話,「以前覺得好可惜,但𠵱家覺得已經冇乜好講」。莫非係擔心活化後租金高昂?佢就話「唔係租金問題,而係入場條件呀」。
佢舉例話,市建局早前進行中環嘉咸街重建計劃,一個喺嗰度經營上海雜貨店廿多年嘅婆婆,市建局話佢唔符合資格繼續經營,譚小姐對此不明所以,帶點憤憤不平咁話:「如果呢個社區唔需要佢,佢唔可能經營幾十年,點會由市建局決定佢唔符合資格呢?」
另一個例子係灣仔「囍帖街」(利東街)重建,譚小姐指,有官員當年話會讓商舖回歸,但係重建後整個社區已經變晒調,唔夠十戶願意重返,租金與位置亦都唔同晒。譚小姐見到呢兩個重建情況,早就心淡兼睇化,感慨話:「政府根本冇心畀我哋留低!」