立法會補選明年殺到，泛民各黨派各有各盤算，負責協調嘅民主動力召集人趙家賢擔任「夾心人」，真係死唔少腦細胞。呢位香港自開埠以來歷史上當選時最年輕嘅區議員，原來擁有皇家英國皇家學院色士風（Saxophone）八級資歷，曾經係色士風嘅導師。

中一開始學色士風嘅趙家賢向八方透露，最初原來係學琴，「我對學琴真係冇興趣，只係學到去三級就冇學」。佢話，接觸色士風係因為佢爸爸，因為阿爸都係識得吹色士風，加上中學又有得學，自細耳濡目染，所以一切都順理成章。

喺中學階段完成埋八級色士風，趙家賢之後喺琴行教人賺吓外快，及後喺中大校外進修學院擔任色士風班首任導師。不過由於工作太忙，家吓已經無教，只係平時喺地區嘅周年晚宴，喺街坊面前露兩手。

85年出世嘅趙家賢曾就讀香港嘉諾撒學校、筲箕灣官立中學同筲箕灣東官立中學，佢喺聖公會聖馬利亞堂中學讀中六時擔任學校嘅Head Prefect，而當時中四時有個師妹叫沈江莉，即係邊位？原來係唔少家庭觀眾熟悉嘅高Ling（高海寧）。趙家賢話沈江莉當年喺中學已獲不少男同學關注，為咗幫佢兄弟認識同為領袖生嘅沈江莉，負責「編更」嘅趙家賢，就試過為二人編埋同一更，「好可惜我個兄弟仲怕醜過高海寧，所以最終都係失敗咗。」

何解會由音樂界轉戰政壇？趙家賢話，當年因為參加課外活動認識民主黨前東區區議員李建賢，之後幫李柱銘助選，李柱銘之後邀請佢加入民主黨，入黨後就以22歲之齡、喺2007年於東區太古城西當選區議員，威水紀錄至今未有人打破。而佢亦連任至今。

身為民主動力召集人的趙家賢話，近排因為協調民主派參加明年三月嘅補選，大搞民主派初選，認真「心力交瘁」，大嘆：「唉，我已經半個月無同老婆正式食過餐晚飯」。介紹返，佢喺2011年連任區議員後，隨即向時任女友即太太求婚並成功，雙喜臨門。