張繼聰噚晚連同雨僑、林敏驄仲有導演等，現身九龍灣MegaBox為電影《西謊極落之太爆太子太空艙》進行謝票活動，阿聰同雨僑接受訪問時話，票房至今反應理想，嚟緊都會keep住做謝票活動，希望多啲人繼續捧場。

咁兩位各自嘅另一半支持咗未？雨僑話男友羅力威仲未睇，至於阿聰就話：「我就大鑊啲，我同欣宜比較多親熱場面。」不過佢話老婆謝安琪相當支持佢：「我不嬲拍開呢啲戲我老婆都處之泰然，仲成日叫我做好啲，就住就住做好丟架。」

講到羅力威日前回應向雨僑求婚嘅消息，結果羅力威全程依依哦哦，答非所問，最後先肯承認已經求婚，連身邊一齊做訪問嘅泳兒都O晒嘴，雨僑就笑笑口話：「我有睇到嗰個報導，佢已經答得好清晰，邏輯好好。」

雨僑話知道羅力威咁樣答傳媒起標題會好吃力：「標題係長咗啲，但我覺得好清晰，所以以後呢方面嘅問題都話交俾佢答。而且係幾年前嘅事，佢用幾分鐘講到出嚟已經好好。」

雨僑又透露：「求婚時無跪地無送花，但佢有誠意有心意，下年再Update大家，始終今年得番幾個月。」旁邊嘅阿聰亦話：「我真係睇晒佢成個訪問片，其實都睇得明嘅，不過會諗究竟我睇咗啲咩呢？」