香港有超過1,700間上市公司，要講年輕又靚女嘅上市公司主席，31歲嘅環球信貸（1669）主席王瑤肯定數一數二。佢噚日更加換上新形象、駁咗一把長鬈髮主持公司首個股東會。佢應該已婚、育有一子，但噚日竟然講咗一句：「都想多人追……」，唔通佢婚姻狀況有變？
環球信貸舊年底先至上市，有「靚女財神」之稱嘅王瑤都係第一次主持股東會，不過佢一直係公司生招牌，見慣大場面，面對傳媒與閃光燈駕輕就熟，拍得住藝員、模特兒。

4,000元駁髮　讚快靚正

靚女老闆有一個好處，就係除咗公司業務，時裝打扮都可以同佢傾一餐。提到佢新駁一把長鬈髮，佢話係朋友極力向佢推薦北京一間Salon，話呢間Salon嘅師傅手勢夠晒專業，聲稱半個鐘就可以駁髮成功，仲話不成功不收費。
咁啱得咁蹺，佢早排要去北京出差，佢就順便走去睇吓係咪咁犀利，嗰度駁髮只係4,000蚊人仔，佢覺得價錢合理而效果又正，駁完都好開心。老實講，現場睇佢把頭髮幾可亂真，摸落柔軟，完全睇唔出係駁髮！
見佢打扮得咁靚，有記者口痕問佢「你咁靚，咪好多人追囉？」王瑤竟然笑住話「我都想……」記者即追問「你唔怕老公呷醋咩？」佢又笑住答「唔好講呢啲！」答得咁曖昧嘅，不過跟住佢就冇再講了。
市場一直話佢雖然後生，但一早結婚生仔，不過佢又真係好少提到感情生活，最多都係講佢嘅小情人，之唔係佢個寶貝仔囉！

李華華
mailto:[email protected]