自從韓國有咗tvN、JTBC等收費電視台後，搞到免費台嘅收視越來越差。而今年仲有一星期就完結，韓媒就統計今年播出嘅迷你劇嘅平均收視，最終選出收視之王。

當中迷你劇嘅收視之王就落喺由高賢貞孖李鎮旭主演嘅SBS劇《Return》身上，雖然《Return》女主角高賢貞拍到一半時鬧出是非，被爆打導演，最終高賢貞中途被飛出劇組，女主角改由朴真熙頂上，但無損劇集受歡迎程度，令全劇平均收視為13.68%，最高達17.4%收視，成為今年迷你劇收視冠軍。

第二名則為神劇《太陽的後裔》編劇金恩淑執筆、李秉憲孖金泰璃主演嘅tvN劇《陽光先生》，平均收視有12.955%。第三名係金賢珠、金明民及羅美蘭主演嘅《我們遇見的奇蹟》，平均收視有11%。

至於現時熱播、由宋慧喬孖朴寶劍主演嘅tvN劇《男朋友》播出8集都榜上有名，登上第四位，第五至第十位分別為tvN劇《機智牢房生活》、SBS劇《能先接吻嗎？》、SBS劇《雖然30但仍17》、SBS劇《皇后的品格》、KBS劇《黑騎士》及tvN劇《百日的郎君》。

不過呢個統計冇計返收費台實際收視標準，只從數字上作出統計，如果照計返收費台同免費台嘅收視差額，咁樣《陽光先生》就必定成為今年收視之王。

精選韓流，喺晒《娛果》
http://fb.com/appledailyent