證監會前排關注首次代幣發行（ICO），對面岸澳門就未有相關規管，聽日濠江會發行新嘅加密貨幣，名叫量子金（Quantum Gold），聽講本港金銀業猛人都可能會加盟做顧問，但就賣個關子先喎。
除咗呢位金銀業猛人，本身個班底都係保險業理財顧問出身，阿頭叫做彭宗欣，做過香港保險公司AVIVA；市場總監叫黃俊瑯（圖），即係政黨新思維副主席。
講番今次個發行，量子金發行嘅總規模最多2億枚，每枚量子金嘅定價係0.002以太幣（約10港元），即係集資近20億元，如果用番新股（IPO）集資標準，規模唔細。

籌集資金掘金礦

咁究竟呢個量子金項目係做乜呢？簡單啲講就係籌集所得嘅一半資金，會用嚟買999足金，令到呢隻虛擬貨幣有內在價值；另一半就會用嚟投資金礦，掘到嘅黃金再撥落去買999足金，令到個內在價值越來越高，定時定候又會分一部份出嚟再投資金礦。聽落好似好正，真係有咁大隻蛤乸隨街跳？
睇番份計劃書，原來得當中1.2億枚係公開發售，餘下4,000萬枚係銷售成本，仲有4,000萬枚係管理團隊袋，都成4億元。管理層話，由於有999金做back up，量子金下限風險有限，但增長潛力高，不過投資呢家嘢點會只升不跌，真係要量力而為喎。

李華華
mailto:[email protected]