地產Ｋ話畀左丁山聽，希慎好似唔止裝修商場咁細眉細眼，直情係要將全幢興利大廈拆卸重建。呢幢大廈建於七十年代末，設計不如理想，趁今日地產好市，拆咗佢，重建為智慧型商業大廈，實會脫胎換骨，增加租值，譬如將地底與地鐵打通，建一條隧道橫跨軒尼詩道，地鐵高興，希慎更高興，𠵱家地鐵只通往崇光，到三越要上街面兜彎，所以崇光店零零舍舍旺過三越好多，拆建興利大廈，改建埋停車場，開條隧道嘅話，呢座新大廈點會唔升值？
地產Ｋ又話希慎滿肚密圈，改建興利大廈之後，就會動禮頓中心腦筋，呢幢大廈已經老化，唔符合二十一世紀需要；搞埋禮頓中心，夠未呢？未夠，地產Ｋ預測：「我覺得SunningPlaza大有改善空間，將寫字樓拆卸後，改建成為銀座式商業大廈，地面留番個空曠大廣場，四圍種樹木，內設酒吧食肆，必定煞食到暈，包保一星期七日，日日夜夜都會有車水馬龍之感！」
希慎係銅鑼灣大地主，希慎道一帶，盡是希慎物業，目前雖然收租收得幾好，但如果學似置地咁，將啲舊資產不斷翻新、重建（如遮打大廈、舊文華酒店），更可以maximise希慎手上物業嘅經濟價值。地產Ｋ唔知收到風吖還是一味靠估，講得有道理。