許志安最近推出浪漫情歌《教我這麼愛下去》，安仔講到新歌內容：「雷頌德作曲、周耀輝填詞，係一首好深情、好真摯嘅情歌，MV導演細榮同我講，聽完呢首歌，佢幻想到喺一個婚禮上，新郎唱歌畀新娘聽嘅情境，屬於一首教人相愛應有態度嘅情歌。」

上一張專輯《18安士》，集合咗香港4隊勁Band嘅作品，歌曲內容偏向人生哲理，安仔知道歌迷比較鍾意聽佢唱情歌，而隨住年紀、經歷嘅改變，安仔希望喺歌詞裡面帶出同以前唔同嘅愛情觀。

拍情歌MV睇落簡單，但安仔就話有苦自己知，因為導演安排佢喺一個無遮無掩嘅住宅天台拍攝，當日好熱，有30℃，所有工作人員都流晒汗，最慘係安仔要着住冬天衫，着住件厚褸，仲要做出戀愛中嘅冧樣，雖然安仔勉強交到戲，不過頭頂嘅汗就不停咁滴，入面啲衫都濕晒。

安仔笑話：「導演同我講，你深情啲，個人就會涼快啲，我只可以靠幻想，但大家都知我隻眼有幾『大』，我已經盡量擘大對眼，盡量個樣好冧。」

精選娛聞，喺晒《娛果》
http://fb.com/appledailyent