王宗堯（Greg）去年參加7.1反送中遊行，之後警方指他涉嫌闖入立法會把他拘捕及起訴，今年中改加控暴動罪，後日將上庭應訊。昨天Greg在社交網告白，因要負擔過百萬律師費，經濟告急，公開懇請大家「懲罰」自己，歡迎請他工作以渡過難關。今天Greg即時獲得公民黨「飛機師」譚文豪邀請，以5位數字酬勞在譚文豪位於旺角新開的茶餐廳「一日三餐」擔任一日店長。

Greg穿上壹傳媒創辦人黎智英在還柙後翌日，用來鼓勵《蘋果》員工和讀者的一句話印成的「No Fear Fight On」黑色T恤。他於12時多現身茶餐廳，此時餐廳門外已有數十人排隊， 之後人龍一直沒有斷過。Greg換上圍裙後隨即開工，在舖內招待客人、清潔、包外賣等，而Greg又與譚文豪一同走到店外面向久候的客人道謝及與他們拍照，一句句「加油」、「保重」、「多謝你」、「頂住呀」來「懲罰」Greg，有市民更直接問Greg需不需要眾籌或捐款？亦有一女士將錢塞予譚文豪，着他轉交Greg，但都遭他們婉拒了。

Greg指目前首要是處理好自己，聽取不同人士的意見，他說：「需要幫嘅人唔只我一個，我會不斷嘗試更多嘅嘢，幫我之餘希望大家可以幫到更多人。」提到有市民希望捐錢，Greg坦言現時搞眾籌有一定危險：「無論以往有for讀書、法律支援或生活費，對呢啲嘅打壓都好大，所以我哋嘗試將供應鏈擴大，自己有尊嚴地賺到自己應有嘅酬勞，再用啲錢去做需要做嘅嘢。」問到可擔心有客戶受壓而不敢找他工作？Greg說：「搵我嘅相信佢哋背後嘅理念都好堅定，所以唔會怪成個圈有壓力，專注返自己需要做嘅。而家律師費我知道大概條數幾多，盡做，唔想靠人，問人借錢其實好容易，自己亦有一定積蓄，但點解唔可以借自己雙手實踐，我哋係可以做得到。」譚文豪亦謂：「點解要驚呢？宗堯係專業藝人，點解要因為自己理念俾人排斥、俾人打壓？呢個先係有問題，因為怕就唔搵宗堯，咁樣係本末倒置。」

Greg被問後天上庭，他直言心情有慌亦有惆悵：「我有慌有惆悵，不過突然有好多朋友關心我，我就好快pick up返，做返自己嘅嘢之餘，又睇吓可唔可用自己或更多力量，去幫助唔同嘅人。」最後提到背後有很多支持者，他眼濕濕說：「喺疫情下大家負擔都好重，尤其就到聖誕節，大家未能好似以往咁慶祝或團聚，所以大家都好辛苦，希望大家可以過一個平安嘅聖誕節。希望大家都捱得到，撐過去！」

譚文豪指餐廳還在試業中，平日也會出現人龍，但今天卻特別誇張，他說：「大家知道王宗堯嚟，我都係少於24小時前二話不說就搵佢，佢衝出嚟撐。我第一個訊息係想佢嚟幫手宣傳，不過有一個條件，就係要收正價。」譚文豪又指希望在不同範疇上互相幫助：「除咗黃店，點樣去將賺返嚟嘅錢放於供應鏈上，點樣令到呢個圈越做越闊、越做越大，就好似呀Greg背後係演藝界，黃色經濟圈唔只係得食，演藝界又點去生存呢？今次搵宗堯嚟賣一次廣告，當係一個支持，大家都睇到有成效，頭先已經做咗張1,800蚊嘅單，仲有40個餐係話撐宗堯落嘅，並唔係單向嘅，我哋係購買一個專業服務。」

市民韓小姐與兒子排隊近45分鐘撐王宗堯，韓小姐說：「噚日上網睇到知道王宗堯會嚟做一日店長，本身支持譚文豪，嚟支持吓黃店，我帶埋囝囝嚟，因為大家嘅意見係一致嘅。我哋都支持吓佢，我哋會買佢件衛衣㗎。我想同佢講遇到咩困難都好，依然有班支持佢嘅香港人支持佢㗎！」另外，同樣到場支持的麥小姐表示：「支持黃店，支持宗堯！希望加油！希望有心人可以幫到，我知道係難，但相信最終係有解決方法。」

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！