曼聯領隊摩連奴之前同車路士有過一段關係，話晒都曾經兩次上車落車，對藍戰士有特別深厚嘅「感情」都好正常。呢位葡萄牙籍領隊近日又再啄住車仔，話紅魔鬼今季爭標係會建基於進攻足球，唔會學似上季嘅車路士咁，靠龜縮防守贏冠軍。

紅魔鬼贏唔贏到聯賽冠軍仲係言之尚早，不過球隊暫時的確踢出摩佬所講嘅進攻足球，開季三戰全勝入十球兼未失過波。摩連奴話：「你睇下舊年同前年嘅英超冠軍，佢哋唔踢進攻足球㗎，淨係靠防守同埋反擊，從成績上嚟講，呢個就係贏英超嘅方法。但我哋會根據球員嘅質素嚟踢波，希望踢得積極啲，踢得好啲，但當然目標都係為咗贏波喇！」

其實摩佬都有即刻帶定頭盔㗎，佢話：「咁如果有朝一日我哋要踢守勢波嘅話，咁咪踢囉！」曼聯喺英國時間今晚會作客史篤城，紅魔鬼由2013年到呢家都未喺呢個球場拎晒三分，即管又睇下今場可唔可以喇！