趁住聖誕同新年有連續幾日假期，唔少政界中人都趁機外遊唞一唞，叉夠電返港後再衝刺。好似實政圓桌立法會議員田北辰咁，去年除咗議會同地區工作，又要忙住喺人大選舉中爭冧莊，結果喺唔少建制派暗暗杯葛下，以畀上屆更佳成績連任，自己為自己爭返一啖氣。

而打完一場大場，亦係時候放鬆吁吁氣，田二少呢個假期就同家人飛咗去新西蘭，共享天倫樂。新西蘭以好味車厘子著名，仲有號稱全球最大嘅車厘子，田少二途上就有幸遇到，仲同孫女去咗個果園以爺孫檔採摘，摘完一袋袋滿滿嘅，相當happy。
田二少話喎，佢一直相當支持漁農界，好想知道呢種全球最大嘅車厘子，香港種唔種到？但八方更想知道，唔知漁農界選委喺啱啱過咗嘅人大選舉中，有冇支持田二少呢？