莊士中國（298）內房熱賣，NAV折讓又大，吼內房股，吼莊中。莊中09年度（3月底止）業績報告講，集團呢期喺祖國幾個主打樓盤，已簽訂合同但未列入收益銷售額，貼近1.6億銀。齋計呢筆數額，已經超過莊中09年全年度總收入1.07億銀。
再講，上個禮拜尾報載，集團旗下東莞濱江豪園，計劃加價加推，加幅至少5%。項目熱賣，兼預售收益理想，莊中2010年度業績，坐定粒六，大有機會虧轉盈。
莊中最新NAV1.17元，現價（0.395元）折讓已經高達66%，集團市值只得6億銀，但手頭土儲起碼講緊上2200萬平方呎。連人民幣升值因素，土儲每方呎係咁意升值50蚊，總增值已經11億銀，遠遠超過集團市值，莊中真係殘到痹。博莊中現價再翻半番到0.59元，相對重估前NAV折讓，仲挨近50%。

　

珠船短炒博升20%

珠江船務（560）最新NAV1.94元，現價（1.10元）折讓43%，應該係折讓數一數二吸引嘅紅籌股。又珠船上年底止，揸現金6.5億銀，完全冇借貸，每股淨現金高達0.72元，係現價65%，現金牛又多重保障。
珠船最新市值得9.9億銀，市值咁細奀，相信管理層亦都好惜售，有業務壯大機會，應該唔會喺現水平市值有搞作。短打落後珠船，博升20%計數，價見1.32元，珠船未有耐上到NAV水位，預期PE都係10倍多少少。
錢雋