前女子組合2R淡出娛樂圈多年，家姐黃婉君（Rosanne）就於09年嫁給牙醫Derek，二人生下兩名兒子，分別是8歲的大仔Dylan及6歲的細仔Daniel，而妹妹黃婉佩（Race）亦於16年再婚，嫁給新加坡富商David Loh，前年更誕下囡囡Cara，各自忙於打理家庭和照顧子女。

Rosanne與丈夫及兩名兒子就留在香港生活，雖未似妹妹Race嫁得有錢人，但她的丈夫Derek開牙醫診所，一家生活都相當中產無憂，而作為人妻的Rosanne婚後就沒有工作，專心湊兩個囝囝。日前一個星期六（11月23日），《蘋果》直擊她帶着兩個囝囝去了赤柱廣場度周末，當時大概5時多，見她與一些家長朋友在廣場中央駐足吹水，由於廣場當日有活動進行中，小朋友就在廣場的遊戲設施玩耍，見Rosanne幫兒子揹住背囊做「書僮」，與一名女士傾偈，一邊傾一邊望住在遊戲架玩的兒子。大概傾了15分鐘，她就會合兩名兒子，現場還見到一名男家長帶同兩名兒子與他們三母子一齊玩。見兩名兒子都玩得盡興，尤其是細仔Daniel，見他近距離追住另一名男孩，將肥皂泡吹到男孩的臉上，然後大笑，而哥哥Dylan企在旁邊觀察都已經十分開心。

兩名兒子與其他小朋友玩耍時，見到Rosanne企埋一邊撳電話外，亦緊張兒子，不時望望他們在哪兒玩耍，之後就再會合一起，原來大仔要玩鬼口水，她就做「跟得媽媽」從背囊中拎了一盒鬼口水出來，分給其他小男孩一齊玩。眾人玩到近6點，三母子就與其他家長及小朋友話別，行到去商場行人電梯，向停車場方向拎車走人。

採訪、攝影：朱志聰、孔志豪

------------------------------
《迪士尼公主大世界》
14位公主一書睇晒
-----------------------------
【撐學生】
召集有心人 撐學生全年睇《蘋果》
立即按此