今晚（5日）快活谷夜賽，共有七駒剛於上周三（9月27日）跑完匆匆再出，「滿載而來」、「金叻星」、「上浦猛將」及「雷公鑿」四駒更用埋王牌報名，不少更是挾好走勢或締速而來，決心匆出求功。

最值得留意係頭場五班1650米沈集成馬房的「滿載而來」，此駒今季降入五班後兩戰均有好走勢，包括上周三於同班同程跑第四，當時排11起步，出閘後拖後切入，可惜沿途居於「友歡笑」之後無法推進，臨入直路才能移出發力，在最後階段取位欠順，仍交出全場最快末段時間23秒06追近，比起當晚三班同程衝得最勁之「勢必跑」還快0.01秒，五班馬有此竄勁當然唔簡單。

觀乎今季另一匹造最快末段時間後匆出之「紅星」，已立即贏馬補中，「滿載而來」咁快又跑，應是決心求交代之部署，雖然排12檔，但潘頓上季四次在谷草五班賽抽12檔，均非冠即亞，仲勁過雷神莫雷拉，因此未許低估。