「叫我做哲古華拉！」死火嘞，曼城本來已經有巴洛迪利呢個癲佬，家陣嚟埋阿古路呢個理想主義者，希望佢唔係空談理想，否則曼城爭標路休矣。

避談老馬煲哲古華拉

阿古路前日喺曼城完成體測後，球會都未正式宣佈，佢就急不及待喺twitter公佈自己已投「城」，而佢接受訪問時好明顯唔想再孭住「馬勒當拿女婿」呢個包袱，反而想效法阿根廷革命家哲古華拉，誓要為現代足球帶嚟新革命喎：「冇人可以複製馬勒當拿嘅成就，佢嘅時代已成過去。總有人需要為足球帶嚟革命性嘅改變，嗰個人就係我。」
「假如我能夠達到呢個目標，開創一個屬於自己嘅足球新時代，我就係球壇哲古華拉。」佢越講越興奮，不過曼城高層一定唔會同你講咩理想，最緊要係你幫球會贏到錦標。梗係啦，據報曼城出到20萬鎊（約254萬港元）周薪同你簽約5年，加埋5,200萬鎊，再加埋3,800萬鎊嘅轉會費，成條數加埋承惠9,000萬鎊（約11.4億港元），如果幫唔到曼城攞好成績，球會高層、球迷都肯定唔放過你。

周薪254萬躋三甲

如果淨係計人工，阿古路嘅周薪甚至高過馬體會師兄費蘭度托利斯（17.5萬鎊），不過佢仲未係英超周薪最高，最高仲係曼聯嘅朗尼（25萬鎊）、隊友耶耶托尼（22萬鎊），而阿古路同怕且好快離開曼城嘅阿根廷同胞泰維斯，就並列第3。總之前4名都係嚟自曼市球隊。
曼城嚟緊周末喺都柏林出戰愛爾蘭聯賽選手隊，日前公佈大軍名單時特別預留一個冇提名嘅前鋒空缺，擺明一早留位畀阿古路，所以佢好快有機會實踐佢所謂嘅足球革命。講開又講，咪以為馬體會賺一筆好爽，皆因巴西前鋒迪亞高哥斯達喺周三訓練時受重創，右膝十字韌帶撕裂，要唞半年，係時候破財買前鋒囉。