前排美日股市勢如破竹，中港股完全冇受惠；近排美日股繼續破頂，RSI仲出現頂背馳，中港股終於追落後。單睇港股，藍籌兩三周前開始升，但二三線股一直冇料到，去到本周先開始喪炒，由於個別低殘股單日回升速度太急，噚日太多股份唔升一成都升半成，似乎趕住開飯，有時日無多之感，似短線升浪尾聲多過中線升浪頭，再者，除咗講嚟講去嘅量寬之外，諗唔到港股有中線炒上嘅新理由，晉佳覺得形勢唔太好。
炒風由大價股轉去中細價股，甚至垃圾股，喺短線升浪嚟講，通常只會維持三幾日。𠵱家應該係中線減持股份，然後改打短線游擊嘅時候，今日入市，聽日就要開車先得，冇把握去衝就等機會低撈算數。

噚日孫柏文推介安莉芳（1388），一隻晉佳一直有留意嘅股份，過往增長緩慢，所以引唔起投資者注意，兩三年前大家喪炒本地零售股時都遺忘咗佢，但時移世易，I.T（999）、慕詩（130）、景福（280）已經全線跪低，安莉芳仲可以保持穩定增長，更顯得佢可愛。
安莉芳過去三年盈利增幅介乎10%至26%，但收入升幅差唔多，經營槓桿唔大，盈利好難爆升，註定做穩陣派。今年第一季整體銷售升8%，相信全年收入同盈利升一成左右算係合理。美中不足係派息唔多，股息率只有2.7厘，喺淨現金達2億元之下，派息咁低會令投資者減少信任度。
安莉芳歷史市盈率11倍，以盈利增長一成至兩成計，出年市盈率約10倍，現價當然偏平，如果用13至14倍作為目標價，相信兩年內見到孫柏文目標價8元唔奇，但如果港股今年好似惠理謝清海講到咁好景，去到27000，呢個回報就唔算吸引。
睇股價走勢圖，中線似行靚絕嘅盤形走勢，長線升浪已經展開，問題係俾孫柏文唱起之後，9RSI升到去85.39，短線可以唞唞氣，或許有4.60至4.70元畀你買，唔使急住搶。

晉佳
本欄逢周一、三及五刊出