雖然轉會窗死線日去唔到巴塞隆拿，尼馬話菲臘比古天奴好傷心，但最近為巴西服役時，古仔似乎又冇乜事，仲同尼馬喺練習時一齊整蠱吉祥物。

其實尼馬喺前球會巴塞隆拿練波時，都同蘇亞雷斯用過同一招整蠱碧基，但今次對象就係巴西足球吉祥物Canarinho。當古天奴同戴上Canarinho頭套嘅工作人員傾計時，尼馬就好似做上壓咁匿埋喺Canarinho身後，之後當古天奴輕輕一推，對方就人仰馬翻咁倒地。

由於利物浦多番拒絕巴塞報價，古天奴會喺完成國際賽後，就返回紅軍報到，相信會喺下場對曼城嘅大戰首次在今季英超亮相。至於巴西周二場世盃外圍賽，就要作客哥倫比亞。