二十四年半。盧偉權做了富豪私廚二十四年半，服侍過富豪家族三代人，一周工時兩三天，舒服到不得了，卻忽然不做，自己開了檔「圍爐」煮順德菜，4個月瘦30磅。老友笑他戇居，年過半百還去「捱世界」，他卻說要追夢，想開一間屬於自己的餐廳。

17歲那年，盧偉權還在街市賣餸，見鳳城請人，便去學廚。特別喜歡煮餸？不算是，貪福利夠好。「做廚房包食，鳳城仲好，有宿舍比埋你瞓，租都慳埋。哈哈。」正式「揸鑊鏟」前，什麼都要做，掃地、通渠和刮爐灰。那年代用的仍是炭爐。

順德菜講究鑊氣、乾身，要快炒，他在鳳城也只待了三年，一身功力，多得創辦人馮滿傾囊相授，這是他人生第一個感恩。「佢唔會留返啲唔教你，落場時間就靜靜教你，例如斤兩係點落、點炒菜。」講起鳳城，依然自豪，原來富豪廚房班底，都是師兄弟。

學完師後到處打工，又到英國讀酒店管理，沒定下來，直至1993年重遇老東主「阿叔」。其實「阿叔」外號並非阿叔，純粹是某上市公司主席的叔父。當時阿叔二話不說，叫他歸巢，這一歸便是二十四年半。「阿叔真係好好人，我同佢賓主關係4年，未見過佢發火，一次都冇。」

有一次，他知道阿叔沒飯局，索性不去公司上班，卻突然有客殺到。「嗰次過咗澳門，哈哈，call都call唔到我返嚟。」咁點算？「阿姐買飯盒返嚟，過落個碟到，攞出去囉。」「佢冇嬲，只係話有冇搞錯，咁都想呃到我？咁我自己都唔好意思啦。」

又有一次，收工後要到阿叔家煮飯，「我諗住唔收人工，佢咁好人，佢話唔得，你一定要收，唔收就唔使嚟。」「最後佢買菜錢畀足，再畀封利是我，成1000蚊啊大佬，嗰時打工都係幾百蚊日咋。」他的第二個感恩便是找了好老闆，而且不止一個。

他說，做了才知道富豪私廚是舒服工，一周工作僅兩至三天，甚至更少，人工卻較市價高一點；當中最大困難是要熟悉各人口味，又要諗新菜式應對，尤其阿叔。「佢真係識食，你炒飯炒得唔夠香，落少咗蔥、湯煲得唔夠時間，佢都知。」「佢就同秘書講，秘書又同我講，老闆話你今日遲到，啲湯煲得唔夠時間喎。」點食得出？「我都唔知，就係食得出。煲湯時間差太遠我都飲得出，差兩至三個鐘，連我都飲唔出。」

四年後阿叔離開公司，家族第二代接捧。新老闆明顯忙得多。「佢食完飯，轉頭都唔見人，一個月分分鐘都見唔到一次」客人的類別都多了，不止商界。「最難忘係有次佢請幾個高級客人，啲保安入嚟廚房查乜咁查，幾乎連個爐底都要查。」「個個都黑人嚟，好大隻嗰啲。」

不變的是，新老闆一樣和善，未責罵過他。「佢好得意，唔會話你，湯好味就飲多幾碗，唔好味就飲一碗算。」連飲食口味都一脈相承。「佢哋幾個都唔食太濃味，特別係主席比較清淡；佢哋家族都鍾意飲湯，唔止老火湯，滾湯好味都飲。」

全家口味瞭如指掌，這是做私廚的功夫。「做私廚最大分別就係要知客人想食咩，而且唔可以成日煮同一樣嘢，要諗多啲新菜式。講真，日日食鮑魚都悶啦。」還要懂得睇眉頭眼額。「食物拎返嚟，剩咁多即係唔鍾意食啦，見到清晒咪鍾意食囉。」

不過，天下無不散之筵席，再開心都有散場日。「都係心願，希望自己開間舖，試下新事物，接受挑戰。」「而家最辛苦，朝早9點返嚟煲湯、整炸雞，要4個鐘之後先可以炸，吊乾身先炸，個皮先脆。做私廚186磅，而家得返160磅多啲。」以前嘆慣享受慣，現時卻要捱，但心中到底還是高興。

「樂趣係，私廚只係對住幾個老闆，自己開舖所有客人口味都唔同，街外客同老闆話好食，個心情係唔同。」「呢間舖咁細間，有多啲機會接觸啲客。」預料不到的是，雖然離職開檔，但舊公司高層、同事，甚至第三代都光顧，彷彿又成了公司飯堂。

「老闆個仔好斯文，冇架子，嗰日嚟我到，話早排唔得閒支持你，而家嚟食餐飯。」舊同事幫襯有無員工優惠啊？「第一次嚟咪免加一囉，第二次就收晒，哈哈。」開局不錯，這是他人生第三個感恩。

二十四年半，世代更迭，世界變、香港變，公司都變，連生肖都走過兩輪，盧偉權卻仍在廚房，默默捋起衫袖，反覆勺著滾油，煮著17歲在鳳城學做的蝦多士。

記者：張浚浩　張嘉鎣

全球樓行 Dream House零距離
https://hk.feature.appledaily.com/overseasproperty