林嘉欣和已離婚的音樂人陳光榮拍拖至今已有一年，她以「簡單」兩個字來形容感情生活，聽起來似白開水，但言談間卻洋溢着幸福甜蜜的暖意，嘉欣表示喜歡對方夠善良及坦白，至於對方是否喜歡她的甜美笑容，她即笑說：「我唔知佢鍾意我啲乜，我太惡同太tough（硬），我其實好男性化，有時都覺得自己外表同內在唔一樣。」
至於二人相處之道，嘉欣表明最重要是互相尊重，她指大家工作時間顛倒，只要互相關心同支持已很足夠，更不需要日日夜夜地纏在一起。

隨時離開讀書

問到可有結婚打算，嘉欣聞言即笑稱：「冇諗同冇提喎，可能我喺單親家庭成長，細個我會去圖書館查乜嘢叫離婚，我知父母離婚都係為大家好，但我會有疑問，既然要離婚，咁當初又為何要結婚呢？無可否認父母分開對我有一定陰影。」
嘉欣續說：「其實結婚只係一個形式，一步一步嚟，大家喺相處上已有默契，亦好知大家嘅心，佢知我個心入面好着重屋企同事業，我好開心有佢呢個朋友，因為我咁忽略佢，佢當初聽我講話最着重事業，只係『吓?』，然後話『我明喇』，所以我覺得佢幾慘，女朋友應該要好sweet，但我冇，反而我成日同佢講重有好多事想做，我唔排除隨時會走去讀書，所以我同佢事先講明，好過畀一個夢佢。」