政改決戰明晚揭開序幕，由公民黨黨魁余若薇同特首煲呔曾打頭場，兩人「金魚缸」式辯論聽晚6點35分開鑼。雖然呢場辯論大家得個睇字，輸贏對政改通過或撤回無關痛癢，不過余大狀認真備戰，噚晚9點半親自上政府總部辯論場地視察，政府總部係煲呔主場，唔預先試吓企位，容乜易未輸人，先輸陣。
為咗令廣大市民可以「參與」呢場辯論，兩個免費電視台聽晚會全場直播，TVB破天荒腰斬6點半新聞，亞視則製作特備節目《辯論之後睇真啲》，邀請名家賽後評析，據講嘉賓包括「食力」練馬師簡炳墀、名嘴林旭華同岑建勳等多個名人，宗旨係不談政治，只講八卦，以最平民化角度做馬後炮。
八方噚日問簡炳墀點解會做政論節目嘉賓，佢牙擦擦咁話自己相馬相人皆精，唔使等到聽晚，辯論前已經夠膽寫包單：「我100%買余若薇win！」簡Sir以馬論人，指煲呔雖然有主場之利，但睇往績，臨場表現多數失準，「佢好易nervous（緊張），唔係高班馬」。

簡炳墀：起錨着草呀

簡Sir又指政改話事權在北京，煲呔想去馬都有心冇力；反觀余大狀真正高頭大馬，有實力狀態又fit，可以看高一線，加上余若薇係資深大狀，「打咁多官司，靠把口搵食，贏面高好多」。簡Sir賽前做足功課，認為呢場辯論多此一舉，「根本只係一場騷，輸贏得啖笑，港人自講之嘛」。佢講到興起，鬧埋起錨口號，「起乜鬼啫！都冇終點，起錨走佬着草呀」？
被視為surewin嘅余大狀噚日透露辯論前心情，話因為市民對佢期望太高，令佢壓力好大，而且佢工作繁忙，預備時間唔多，電視辯論同在法庭打官司唔同，佢講嘅嘢是否「入屋」係未知之數，所以絕對唔敢話自己必贏。
明晚辯論兩位主角最多可帶同四人到場，余大狀為紓緩緊張情緒，據知會請丈夫胡醫生到場撐佢；煲呔方面，既然抄襲外國政客同反對黨辯論，梗係要帶埋曾太亮相，先似「政治家」啦。
mailto:[email protected]