同主攻中國嘅私募基金揸fit人傾開，佢話內銀放貸速度仲未復蘇︰「優質巨企唔敢貿然搞Project，加上手頭現金充足，就算銀行主動Approach都無動於衷；相反，中小企非常缺水，但銀行驚佢哋走數，就算息口貴一貴都唔敢搞。」難怪經濟數據越嚟越差，不過佢估計，減息及RRR等政策會係第四季發揮作用，屆時情況有望好轉。唐牛都希望佢預測成真，否則港股都好難發圍。
上周五股市繼續兩極化，中移動（941）連續第二日洗倉，相反績優股係威係勢，好似華創（291）咁，Q2核心盈利有增長，啤酒業務更扭虧為盈，刺激股價單日抽升11%，相信升勢冇咁快完，直至淡倉投降為止，戰友睇QQ升極唔停就會明白。
美麗家園（1237）經過一輪調整後，成功係1蚊水平築底，上周五收報1.05元，冇升跌，呢隻專做木製家具嘅半新股，早前發盈喜，相信上市高位1.09元並非阻力，一旦破位，就海闊天空。
唐牛