【李八方online】 一聞「970士巴拿」 警方即閃人 區議員：乜警隊好缺人？
蘋果日報 2020/09/15 23:16
李八方online區議會交通及運輸事務委員會甄翰揚抗暴之戰區議會新巴車長
本月6日嘅九龍遊行，警方指一名新巴970號線車長喺彌敦道「無故響號」及「快速行駛」，指控車長藏有士巴拿，將佢拘捕，並控以一項不小心駕駛罪。民主黨3位區議員曾自鳴、李偉峰、朱子洛今日（15日）喺區議會交通及運輸事務委員會就此事提出緊急討論，警方一聞「970士巴拿」色變，急急腳話有事，拉隊走人。藍絲都話啦，冇犯法怕咩嘢，究竟班警察怕乜呢？
唔知警方係咪收到風委員會會議會傾「970士巴拿」問題，定係真係貴人事忙呢？佢哋連交委會會議都未完，就話自己有公事需要走先，社區前進胡穗珊隨即提出質疑：「警方唔係應該預留咗時間畀交委會㗎咩？」
佢又質疑警方喺咪真係咁缺人，有咩公事要早走？警務處代表甄翰揚話，佢只係依照上司嘅指示離開，仲好不屑咁話：「可能大家把尺唔同。」啱呀，警方把尺，從來都同香港人唔同。
警察公共關係科覆返八方，話佢哋係完成咗同佢哋有關嘅議程先至走，至於點解喺區議員向主席申請緊急討論之後先至提出、點解唔調配其他警員協力、離席嘅原因就一概冇回覆。
油尖旺區議會交通及運輸事務委員會委會今日開會。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！