港超聯今日繼續一日兩賽，其中夜晚八點喺將軍澳運動場爆發重量激戰，由南華迎戰香港飛馬，但焦點人物「陳18」陳肇麒因為轉會條件所限，呢場冇得倒戈鬥「少林寺」啦！南華上場菁英盃八強以1:4慘負和富大埔腳下，搞到高層下令懲罰性加操，就算目前落後多打一場嘅榜首東方龍獅10分，但教練狄恩表明就算追唔到雙頭馬車，都要為將來重建爭取成績！至於飛馬除咗缺少「陳18」，仲有中堅艾華度停賽。

下晝五點半頭場方面，九巴元朗喺元朗大球場迎戰理文流浪。喺有趣賽程安排下，元朗餘下六場聯賽都喺地頭出擊，包括今場出戰傷兵滿營兼有葉頌朗停賽嘅流浪，教練曾昭達就話希望有助搶分。

港超聯今日賽程
開賽時間　對賽球隊　場地　票價
5:30pm　九巴元朗[5]vs理文流浪[7]　元朗大球場　$60、$20
8:00pm　南華[4]vs香港飛馬[8]　將軍澳運動場　$80、$30