香港地家人人講「升呢」，傳統名校不甘後人，轉直資後間間籌錢搞重建，常規課程加入新元素，位於佐敦嘅拔萃女書院同埋拔萃女小學，舊年開始重建，預計2011年9月啟用，新校舍可用面積比舊校舍多1.5倍，中小學每一級都會加多一班，校方有新搞作迎接新校舍，會將高爾夫球列入PE堂常規課程，即係女拔學生人人有機會扑白波仔。

新音樂廳可坐1500人

新校舍噚日舉行奠基禮，女拔校長劉靳麗娟同八方講，起新校舍係為咗學生學習着想，啟用之後有好多新設施及新活動，例如以往學生上體育堂玩高爾夫球只係玩玩吓，將來就會納入運動堂常規課程，人人都一定有機會接觸到呢樣玩意，打得好嘅話仲可以組隊出賽。
據講女拔學生會去西貢滘西洲球場學打波，喺真草地打18個洞，事關新校舍寸土尺金，雖然只有練習設施，不過對一般人嚟講都幾奢華o架。此外，新校舍會加建50個宿位，畀交流生短暫入住，又會加建一個可坐1,500人嘅音樂廳，規模媲美文化中心個大劇院，劉靳麗娟話可租借公眾使用。
本來舊校有嘅室外游泳池，將會移師室內，變成全天候暖水池；校方亦預留空間同資源發展IT教學，包括引入多媒體實驗室、科技室等。興建新設施有得有失，校內原本有24棵樹，家斬剩8棵，校方指最值得保留僅兩棵，一棵係南洋蟠桃，高15米，樹冠闊10米，另一棵係落羽松，高12米，樹冠闊5米，學生暱稱佢為「聖誕樹」。

3.8億元建五星級校舍

興建呢個多功能五星級校舍費用達3.8億元，校方已經籌到兩億幾，餘下一億幾雖未到位，但劉靳麗娟話好有信心校友、家長會踴躍捐款。不過，羊毛出在羊身上，劉靳麗娟指女拔轉做直資五年來冇加過學費，噚日事先張揚會加價，話補貼燈油火蠟同維修保養都好合理。

mailto:[email protected]