澳門2015年博彩收益平均每月192億（澳門元．下同），較高峯380億元收入已經大瀉一半。今年第一個月賭收187億元，貼近去年平均收益，加上澳門旅客量及酒店入住率回升，連同新年憧憬，澳門賭股睇怕可以見底啦？
上月賭收跌幅接近12個月以來最低，但亦有兩成，因為去年1月開始嚴正打貪，賭收基數高，反而2月有農曆年假，賭收都大跌49%，今個月賭收可能有驚喜唔定！

一眾賭仔新年都會過大海玩吓，去年內地厲行打貪，加上兩會在3月舉行，戒嚴咁嚇到內地客心慌慌，完全無膽踏足澳門，令去年2月有農曆年假，賭收亦只有195億元。
不過，澳門見底指標出現，酒店入住率回升，去年12月已升至超過80%，年初一至初五澳門酒店傳已爆滿，澳門去年12月旅客增長3.7%，非常驚喜，是去年2月以來最好表現，相信中場、家庭客新年過大海，或可抵銷一下貴賓廳的跌幅。如果新年澳門旅客量持續，加上中央又出聲話會撐澳門，相信澳門2月博彩收入可能有好意頭，唔知2月博彩收入有冇機會挑戰21個月以來首次上升呢？
過多個星期就開估，不過，大前提係中國經濟唔會爆。

Melody
本欄逢周三刊出