噚日喺西九文化區苗圃公園舉行嘅電子音樂節，發生1死3命危慘劇，警方喺現場撿獲小量毒品，正調查是否有人濫藥，油尖警區刑事調查隊跟進。（新聞連結： http://bit.ly/2yg3HrL ）

事件仍在調查中，但就似乎唔係好影響到參加者貼圖打卡嘅興緻，其中一個係白雲。

白雲今日分別喺微博同社交網站貼噚日去參加電音節啲相，露少少事業線當然唔在講，仲有好多佢同班姊妹啲嘟嘴合照，見佢哋着到少少布，玩到好high咁，睇嚟好盡興。白雲冇乜留言，只係落咗一大堆hashtag，包括enjoylife、socialenvy同photooftheday等。

至於陳瀅，就孖住好姊妹何雁詩現身，又係乜都冇講，落咗活動個名嘅hashtag就完咗，何雁詩搶鏡好多，嘟到個嘴長一長，但又唔係錫陳瀅嘅，唔知佢想嘟俾邊個睇……

而何雁詩對於發生一死三命危慘劇，佢回覆傳媒表示：「好可惜呀！現場都好多人，特別係呢個天氣底下有啲焗。我入去嗰陣，都見到有個人瞓咗喺張擔架床度俾人推出去，嚇咗一跳！唉，其實香港好難得越來越多音樂節，如果大家喺安全情況底下去enjoy，咁就大家都開心啦！」