阿爺一聲令下，「港版國安法」勢在必行，據聞呢排藍絲陣營好似食咗偉哥咁，非常亢奮，自以為「光復香港」，有心人仲製作咗一個「反中亂港甲級名單」，發送到藍絲群組分享瘋傳。甲級名單，肯定非同凡響，八方都睇睇，有邊位黃絲或者民主派人士做到嘢「被認證」？咦，曾經喺律政司司長鄭若驊爆出醜聞後護短嘅資深大律師譚允芝、身兼全國政協委員嘅資深大狀馮華健、前律師會會長王桂壎，以及經常邀請高官出席節目暢談時政嘅商台主席特別顧問陳淑薇，竟然一一榜上有名，唔通佢哋做咗啲，只有藍絲先知嘅「反中亂港」行動？

肥彭居首　肥佬黎第三

認真你就輸，咁八方想贏，唔認真地睇睇，只見前港督彭定康排首位、前政務司司長陳方安生第二，壹傳媒創辦人黎智英則係第三，呢三甲都算藍絲心水，但排名上唔知佢哋有冇異議？至於其他上榜人物，港獨派有民族黨陳浩天、演藝界有黃秋生、法律界有陳景生、沈士文等，學界則有中大馬嶽、蔡子強等，當然唔少得一眾民主派立法會議員同區議員，據知有人就對於上榜「不是味兒」，唔係因為被點名，而係要同上述建制人士「齊名」。

講真吖，睇返呢張流傳嘅甲級名單，叫你數300個人名都數唔夠，足證香港嘅反中勢力，不外如是。而近期受兩辦連轟、身處北京追殺風眼嘅公民黨立法會議員郭榮鏗，排名188仲低過佢哋個黨嘅義工，認真「陰功」。

李八方