方力申同鄧麗欣(Stephy)拍拖10年，上周四突然透過經理人公司發聯合聲明宣佈分手，小方噚日獨自見記者禁不住流下男兒淚，承認雙方「有問題解決唔到」，全城關注!

分手雖然係兩個人嘅事，但佢哋身邊朋友都好關心，今日讀者陳先生就透過「爆相爆片」，爆小方今日去咗跑馬地HongKongFootballClub嘅私人會所做運動，仲有一名男性朋友相陪。

讀者陳先生稱，今午12點，見到小方同友人先去咗健身房做GYM，約1點鐘準備離開之際，佢哋就去咗買酒。片中見到戴住鴨舌帽、全身黑衫配黑褲嘅小方，成程面無表情，隱約聽見Sales姐姐話：「兩隻唔同味，Tequila淡啲。」陳先生表示：「佢(小方)原本想揀Tequila，諗住啃啲，但最後都係揀咗支$220紅酒，嗰支約14、5度，。仲聽見佢話『呢支酒啃唔啃？勁唔勁？我哋攞嚟隊酒嘅』，二人逗留15分鐘就走咗。」

睇嚟10年情觸礁，真係令小方好傷心，要用酒精麻醉自己。問陳先生係咪第一次喺club遇見小方？佢話：「唔係，都見過幾次，但就唔係常客。今日喺健身房就見到佢玩跑步機同舉重，全程都冇表情，同乸埋口面。」