著名鬼馬填詞人黎彼得的作品膾炙人口，曾與歌神許冠傑（Sam）合作填出多首大受歡迎的歌曲，可惜兩人卻難逃「7年之癢」的命運。最近他接受車淑梅的電台節目訪問中，細訴與阿Sam過往的一段「情」。

黎彼得憶述阿Sam當年因看到他在《年青人周報》寫的專欄而結識：「當時Sam為《半斤八両》填詞，有句『夠薑就揸槍走去搶』出現問題，佢發覺一個人寫詞唔足夠，要搵個拍檔，可能佢欣賞我古靈精怪嘅腦袋……我幫佢執返（歌詞），加咗『滾水淥豬腸、濕水炮仗點會響』，又幾得意，不過佢話嗰首歌就唔可以出我個名，我話冇問題，其他歌佢都有出我個名。點知我哋一合作就好似炸彈咁勁，好轟動！」兩人在電影《半斤八両》中合作的12首歌，每首都大受歡迎，但成功背後付出亦不少：「晚晚通宵傾偈度橋，我哋嘅相處就好似『乞兒與王子』，佢咁紅都當我老友約我去游水、釣魚……大家好合拍！Sam 本來唔煙唔酒，但識咗我之後，開始同我一齊食雪茄飲香檳，享受吓！佢教曉我好多，又介紹我去電視台做編劇，佢係我恩師，我哋擦出火花，不分你我！」

黎彼得與阿Sam曾是最佳拍檔，但可以後來因輿論及阿Sam太太的原因，令兩人「分手」收場：「經過7年合作，因為輿論，我哋開始有唔夾，其實我冇介意（填詞人）排名嘅先後，難得佢畀我出我個名，不過其實唔出都得㗎……佢提議不如分開一下，呢次並非一廂情願，因為（我哋）開始冇話題、冇偈傾，佢太太亦都唔想我出現，因為晚晚同個男人一齊喺屋企通頂，Sam 都話『我老婆又投訴今晚又同你一齊』……分開咗之後我自覺多咗存在價值，唔再依賴別人，唔需要人哋關照。我封筆幾年後，黎小田就叫我出山寫《Monica》嘅詞。」

問到跟Sam合作的7年中，是否其人生中的高位？黎彼得說：「有人說我功高過主，講真功未高過，亦都冇蓋過主，Sam好早已經係超級巨星！」再問兩人還是否有機會再合作，黎彼得亦直言說沒有：「大家已經係長者，唔好玩啦！過去就係過去，無謂再依戀……分咗手之後已經幾十年冇見冇通電話，最近Sam演出我哋都冇再聯絡……但係我希望佢健健康康，唔好再掛心嗰啲筷子有冇人食過、嗰啲床品係咪有好多塵蟎，繼續好似當年我拉佢去油麻地廟街食炒蜆，抱着大無畏精神，食完肚疴，疴完再食！最難忘喺嗰度見到鐵絲網上由寫信佬寫上兩句『命裡有時終須有,命裡無時莫強求』，之後更成為《浪子心聲》嘅歌詞紅足幾十年。我希望佢（Sam）繼續做個開心人，因為我多謝佢upgrade咗我，佢係我恩師！」

另外，黎彼得雖然經常在電影中飾演一些猥瑣的小人物，但他就自爆現實中的自己好有女人緣，可以拖住梅艷芳的手，聽她談得不到的愛情，男人辜負她的故事；又可以於拍劇期間在關之琳的心口寫毛筆字：「靚女放心就係知道我冇歪念，我與有榮焉，又例如拍《富貴吉祥》導演要我性騷擾張曼玉，佢話唔使搵其他女士替佢嘅手，佢話係演員道德，其實佢哋知我嘅所作所為就係正人君子。仲有當年翁美玲事件，吳君如不斷被追訪，佢為咗避記者，就嚟我屋企瞓咗成個禮拜，因為大家都住北角，佢又知我係絕緣體，我真係有心無力，亦都唔會情不自禁……」

-----------------------------

打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新