旺旺集團老闆蔡衍明入股亞視，當然唔甘心只做提款機，派遣心腹入主亞視理所當然。亞視噚日終於宣佈，委任49歲嘅胡競英做行政總裁，即日履新。好似當日上任CEO嘅王維基咁，胡總已同員工、部門主管見面，不過就冇魔童咁囂張，亞視中人話，相信呢位女總裁一定唔止坐得12日。

香港各電視台話事人都係地頭蟲，亞視病入膏肓，新老闆搵過江龍好好修理，話唔定可以起死回生。雖則亞視噚日先宣佈胡競英履新，但亞視中人透露，胡總已返工約10日，先後同各部門員工見面，未有特別指示，只係要求同事做好本份。至於會唔會再裁員、換血，據稱新管理層表明裁員已暫告一段落，又強調亞視前景有希望，胡競英一、兩星期內會公佈改革大計。
有曾與胡競英會面人士形容，胡作風爽朗，一副女強人辣妹本色，但唔係王維基嗰種自視甚高嘅態度，亦冇狂踩亞視廣告老土、新聞「娘」、唔做中央台等出位言論，只係話大家日後可以睇吓台灣電視節目有乜可以參考嘅地方，暫時亦未見佢帶來自己人馬進駐。王維基同張永霖以雙頭馬車形式管理，胡競英有蔡衍明撐，據知會全面參與亞視營運，執行主席張永霖係半退休人士，相信唔介意樂得清閒。

香港人可能唔熟識胡競英，其實佢就係當年同譚校長合演《假如我是真的》嘅胡冠珍。胡競英係佢真名，當年佢係台大校花，同胡慧中並稱「台大二胡」，加埋李敖前妻胡茵夢，就稱為影壇「三胡」。息影後佢嫁畀香港商人徐敏輝並移居美國，喺當地取得企管碩士同資訊管理碩士，又有美國、香港會計師牌照，曾喺香港做會計師。
2000年胡返台投入電視圈，03年做緯來電視台總經理，創下電視台營運一年就有錢賺嘅紀錄。蔡衍明搵胡競英整頓亞視，係因為佢老公徐敏輝係促成蔡衍明入股亞視嘅中間人之一，徐敏輝喺林伯做亞視老闆時，係亞視高級行政總監，有此淵源，難怪蔡衍明信得過胡競英，交託佢執靚亞視一盤爛賬呢個非常任務。
mailto:[email protected]