張文慈（Pinky）簽約過檔大台，前日上咗清談節目《今日VIP》受訪，負責訪問佢嘅，係佢個「舊同事」陳芷菁。陳芷菁一開波就恭喜同歡迎Pinky，一嚟就話Pinky想入大台入唔到、又傳佢大台畀得低人工，問Pinky點睇？Pinky話自己冇同人講過：「但係有樣嘢係真嘅，我真係好鍾意演戲，同埋我真係好想加入TVB呢個大家庭，係真嘅。」即係間接澄清咗啲「傳聞」……

之後，陳芷菁就話好似唔覺得Pinky有停過，問佢點睇自己嘅演藝事業，嗰一下，Pinky呆咗，dead air咗兩秒，反問：「我呀？演藝事業呀？」再靜咗3秒之後佢話：「即係…你咁樣問我……」

陳芷菁見佢冇聲出已經即刻補飛，搵嘢講引導Pinky講感受，Pinky就話： 「其實呢，點解我dead air咗呢，因為你問我，你話點睇我演藝嘅事業（再靜2秒），當我以為……（靜咗，開始谷眼淚），唔好意思（再靜）因為我已經以為我自己係局外人，我已經當我自己離開咗，（深呼吸）但係……（再靜2秒）喺我冇諗到嘅時候突然間接到電話，我係可以返嚟囉。」

陳芷菁再話因為亞視執笠，香港電影又少咗，「但係開心嘅，真係唔好意思，我唔知自己點解會咁o架（開始搵手指拭淚，然後強顏歡笑續講）Sorry呀……」陳芷菁即刻話唔緊要，仲話：「呢個先至係真嘅你吖嘛！」

Pinky再講落去： 「其實我入行都差唔多20年喇，由最初開始要做性感戲嗰陣時呢，其實我真係好抗拒o架！甚至乎呢我覺得……我記得有一部我係做壞女人，我嗰陣時嗰部戲係好收得但係我出街被人鬧，跟住我覺得啲人望住我呢，唔係鍾意我o架，佢哋係一定係『嗯，你一定係壞女人嚟o架』，即係我心裏面其實好矛盾好爭扎，但係當然啦，嗰陣時啱啱入行，我又未適應嗰個壓力，同埋好多嘢我唔知點面對，所以其實嗰陣時嘅我係唔開心。

「我咁多年浮浮沉沉，咩角色都做過，o依家對我嚟講呢，我會睇得好開囉，知道都係做演員唧其實，（索鼻）即係唔會再咁執着囉，有咩角色畀我做，我做到嘅都會做，即係我唔會介意係咩角色囉，但係我反而有少少係好希望人哋唔好誤會我囉，唔係因為我個角色做得出色，我係性感或者壞人，就代表我一定係壞人囉，我覺得好多人都係單憑我嘅角色嚟審判我（又開始哽咽），好似……啲人唔明白我囉。」

之後Pinky再講咗啲自己嘅擇偶條件，以及平日鍾意做咩去消閒，就咁，完咗個訪問。