近日紅潮再次氾濫,引來瑞信董事總經理兼亞洲區首席經濟師陶冬喺佢個Blog發表咗「工行(1398)的220億美元與中移動(941)的42億美元」嘅一番感慨,指9年前中移動上市時,若果股份賣唔到9成畀美國人,就會胎死腹中,但今日集資多5倍以上嘅工行,仲未行出香港就已經超額認購幾倍,根本唔使去美國兜售,而且賣得仲貴過滙控(005),真係時代變咗咯。
被網友暱稱為「陶公」嘅佢話,響資金全球來、全球去之下,亞洲國家已由10年前嘅淨資金輸入國變成淨輸出國,加上中國本土資金大量參與中港股債市場,佢估工行新股就起碼有1/4俾中資、華資機構吸咗。呢兩個都係亞洲股市同債市近年出現結構性牛市,尤其H股得以飛漲嘅基本因素。