由周元、吳漣序、李正信等人主演嘅SBS古裝版《我的野蠻女友》，將於29日首播，由於周元將於聽日入伍，劇組特地提前兩周舉行新劇發佈會，等周元當兵前都可以出席新劇嘅宣傳活動。

今日周元孖一眾劇中主演出席於首爾舉行嘅新劇發佈會，即將當兵嘅周元似乎心情不錯，於台上扮花花賣萌，又狂派心心，笑容非常燦爛。對於入伍嘅心情，周元表示：「聽日就要入伍啦，心情好奇怪，比想像嘅好。之前仲跟朋友一齊，都好開心，但我冇笑，朋友都要我笑吓，感覺有一種好沉穩舒服嘅感覺。因為古裝版《我的野蠻女友》係入伍前最後一部作品，所以好在意，拍攝時好擔心會延長，記得工作人員都好擔心。入伍前最後一個作品，所以想要展現更好嘅一面。」另外，周元亦擺出敬禮嘅動作，似係已經準備好要入伍。

問到女友BoA對佢入伍有咩反應時，周元大方回應：「BoA認為（當兵時間）望落好長，但事實上唔係好長時間，叫我健健康康返嚟。」

至於古裝版《我的野蠻女友》難免跟全智賢及車太鉉主演嘅經典韓片《我的野蠻女友》比較，吳漣序坦言：「有壓力，但劇中角色比全智賢飾演過嘅更加露骨同野蠻。」