人人都跳《江南Style》騎馬舞，醫生都唔例外。香港腎臟基金會同香港腎科學會噚日喺摩士公園搞咗個「世界腎臟日在香港」活動，提醒市民要保護腎臟。以往類似嘅活動，都會加插表演環節娛賓。今年一班腎科大醫生除咗做短劇，更加齊齊驚喜大變身，拎住個紙牌腎道具，戴晒黑招扮PSY大跳《江南Style》，呀唔係，係《腎友Style》先啱。

高永文唔肯一齊跳

大家咪以為佢哋hea住跳，其實班醫生誠意十足，練晒成隻舞不特止，重記熟晒舞步冇乜甩。佢哋嘅係打扮上都花咗唔少心思，個個戴晒煲呔同黑超，着埋藍色黑邊西裝外套，似到PSY十足十。噚日朝早都熱熱哋，班醫生跳到滿頭大汗。但係出席同一活動嘅食物及衞生局局長高永文，唔知係怕醜定怕瘀呢，主持幾次邀請都唔肯上台一齊跳番part舞，最後仲要三催四請先肯戴個黑超，上台勉強影張合照。
其實，前任局長周一嶽舊年出席同一個活動時，就加入表演帶領全場幾百人合唱《千個太陽》，如果今年佢都嚟，可能邊跳邊唱「Hey Sexy Lady~」呢。