立法會發展事務委員會嘅委員日前到內地考察東江水等情況，連社民連梁國雄都順利入境，本來風平浪靜，點估到因為何君堯離隊搞出酒杯裏的小風波？話說團員之一嘅何君堯喺行程第二日上午離隊，團友質疑佢違反立法會外出考察嘅規定，結果何君堯嬲豬，喺fb直播嚟個大反撲。

稱講明只參與一日行程

按原定安排，周六下午完成行程，但團友指何君堯周六朝早突然離隊，話要外出用膳，質疑佢違反立法會內務守則相關規定，雖然何之後歸隊隨團返港，但佢似乎因為捱批火都嚟，周六晚喺fb直播反擊離隊事件。
佢話自己一早做足程序通知，同秘書處講明只參與一日行程，仲話佢送團友車時，大家仲「嘻嘻哈哈」，又話前一晚同團友食飯，感覺大家關係良好，例如指公民黨陳淑莊仲隊佢，同團友飲得好開心，「應該有13、14杯」，唔理解團友點解喺佢離隊後就「變臉」，「面對面時就一個面孔，跟住擰轉臉就插人」，自稱頂天立地，「大家做唔到我世界」。何君堯又話呢次內地考察覺得「樣樣都好好」，希望香港議員放手畀政府推行政策。