大市靜英英,小初幾乎悶到瞓着覺,好彩賓架陳打電話同小初傾吓,如果唔係都唔知點打發時間。
賓架陳話,今日掛牌嘅衛科創業(8172)街外唔係太多人有貨,可以睇吓。
衛科係由恒科(8097)分拆出嘅另一隻創業板股份。記得恒科當日上市時,都炒得好勁。自從公布衛科分拆上市後,股價曾郁動過一輪,斷估阿媽有咁嘅表現,阿仔都應該跟進。
今次衛科發行1.49億股,每股40仙,新舊股比例接近50:50。另外,恒科向股東分派衛科,每10股送1股或同等現金,結果有一半恒科股東選擇現金唔要衛科股份。
講完一大堆好似電視台有獎遊戲節目嘅內容後,賓架陳結論係:招股方面,唔係太多貨流出街,基本上有大戶接晒。至於分派嘅股份,又有大部分人折現唔要貨,所以今日唔應該有太大沽壓,如果咁都炒唔上,賓架陳話會幾失望。