來自赤鱲角消息稱,錢曾珙為咗避開傳媒同埋一班聲稱會到場「接機」嘅地勤,提早一日,前晚漏夜搭馬來西亞航空返咗香港。至於聲稱會到機場「接機」以示不滿嘅國泰地勤噚日亦冇動靜。
國泰空中服務員工會主席黎玉嬋話,因為疑被襲嘅國泰地勤StanleyChan已經報警,地勤人員想低調處理,以免影響調查,所以冇「起義」。
不過,佢話大家仍然支持呢次活動,將製成嘅「shameonyou」貼紙貼喺公司內部嘅櫃枱、儲物櫃等,但好可惜被高層勸喻收起,同事只有無奈撕走。佢希望警方調查可以為同事討回公道。其實,公道自在人心,錢高層如果有道理,冇理由怕向公眾交代吖。