處於內憂外患嘅亞視，喺續牌唔明朗嘅情況下，今日又有傳佢哋可能不再獲六合彩嘅播映權，真係雪上加霜。

亞視執行董事葉家寶今日喺大埔總台出席「2014電視節目欣賞指數調查」祝捷會，當然畀傳媒追問，佢話：「傳聞嚟啫，同馬會係長期合作，只不過因為有啲續牌嘅關鍵，馬會都做緊一啲準備功夫，嚟緊呢一季嘅賽馬同六合彩都會喺亞視，係免費電視播出嘅唯一平台。」

講到續牌進展，葉家寶指已交晒所需文件，0依家等通訊局審閱：「如果佢哋有乜需要，我哋亞視會完全配合，我哋對續牌係充滿信心。睇番呢個2014欣賞指數調查，10年前《尋找他鄉的故事》攞咗第1名，10年後我哋《滅癌獻愛心報母恩弘大愛祝福大會》又攞咗第1，證明亞視係得到市民支持。我哋走良心路線，好多觀眾支持呢個正能量嘅節目，正如好多人講，香港怎能冇咗亞洲電視呢！」

之不過有人質疑呢個節目收視得1點？葉家寶話：「我哋對收視調查一直冇參與，到底係咪客觀公平呢？收視調查歷來都係千古之謎。我哋喺網上睇到好多留言同觀眾打電話嚟支持，睇到我哋有一定觀眾群，只不過可能呢班觀眾群未喺收視調查嘅覆蓋，導致我哋收視偏低。」