美國《全美一叮》喺聽日就會宣佈新一季嘅冠軍人馬，雖然香港代表9歲譚芷昀(Celine)十強止步，AGT夢碎，不過嚟緊就有傳Celine老竇同經理人蕭定一，會幫佢接唔少project，嚟緊11月18日，國寶級音樂大師劉詩昆就請咗Celine出席慈善晚會，到時Celine就終於可以喺香港一展佢嘅海豚音。(新聞連結： http://bit.ly/2xecuN9 )

講番Celine每次遠征比賽，老竇譚順生都會陪伴左右，不過有網民就話兩父女嘅樣唔太似，而之前杜汶澤喺自己fb扮Celine妹妹拉票個浮誇肉緊樣，形態同語氣似，爭咁個樣唔似。

有網民就開心大發現，發現鼻尖尖、唇厚厚嘅Celine，其實同一個過氣藝人好似樣，呢個人就係喺大台做過兒童節目嘅司徒瑞祈。望番佢哋啲相，無論嘟嘴、伸脷同口擘擘大笑，都十足餅印咁樣樣，十足十失散父女咁樣。